Un plan para 150 sitios arqueolóxicos no entorno da cidade de Santiago de Compostela | Historia de Galicia
Parque Compostela Rupestre / foto compostelarupestre.gal

Un plan para 150 sitios arqueolóxicos no entorno da cidade de Santiago de Compostela

Tempo de lectura: 3 min.

Un total de 150 sitios arqueolóxicos, uns 50 aínda sen catalogar na contorna de Santiago de Compostela. Este é patrimonio que se recollerá Plan Director do parque Compostela Rupestre, que a Deputación da Coruña e cinco Concellos da zona están a desenvolver para promocionar a arte prehistórica gravada na rocha.

Así o adiantaba a empresa Trivium que se está a ocupar da redacción do Plan neste momento. Tamén así se presentaban o pasado o pasado día 27 nunha reunión do Consello Director e o Consello Asesor do proxecto no Concello de Teo, que detenta este ano a presidencia.

Nela a empresa, gañadora do concurso para a súa elaboración, puxo en común co órgano os eixos fundamentais do proxecto de traballo para a elaboración do documento, aprobándose distintas accións para a súa consolidación. Na reunión participaron representantes da Deputación e dos cinco Concellos que compoñen o proxecto, Santiago de Compostela, Ames, Teo, Brión e Val do Dubra.

Algúns dos petróglifos do Parque Compostela Rupestre / foto compostelarupestre.gal

Seis meses para catalogar, deseñar actuacións e crear unha ferramenta de información

Na reunión detallábanse os primeiros pasos do traballo para o que a empresa contará con seis meses de prazo. Tres deles serán para completar o catálogo e outros tres para deseñar actuacións e plan de xestión. Neste momento estase a desenvolver o proceso de recompilación de documentación sobre a arte rupestre do territorio.

Ademais, paralelamente a empresa está a deseñar unha nova ferramenta de información que permitirá acceder a datos non só de estado e localización senón tamén imaxes e material gráfico, cartografía, puntos de interese da contorna ou distancia entre recursos de interese. Trátase dun amplo volume de información que se articulará en distintos niveis segundo o interese e situación dos sitios arqueolóxicos.

 

O documento incluirá tamén traballo de campo e un profundo proceso de documentación dos xacementos, que se iniciará previsibelmente a semana próxima. Acometerase a recompilación de información como a delimitación perimetral de cada unha das entidades, propiedades ás que afecta, situación dos accesos e outros elementos próximos ademais da análise da situación ambiental do territorio.

A paisaxe como razón de ser do parque arqueolóxico

No plan diferenciaranse distintos niveis dos sitios arqueolóxicos. En primeiro lugar o grupo en que se intervirá, se porán en valor os recursos e se integrarán nos itinerarios. Despois os que se protexerán e intervirán pero que, por distintas razóns, non formarán parte das visitas deseñadas e os que sós se catalogarán e estudarán.

Frame do vídeo promocional de Compostela Rupetre

Ademais un dos eixos fundamentais para a elaboración do Plan Director do Parque é partir de considerar a paisaxe coma un dos elementos fundamentais de análise e fío condutor entre a arte rupestre e outros recursos patrimoniais do territorio. Desde o Consello Director e o Consello Asesor coincidiron á hora de destacar que a conservación da paisaxe é inseparábel á intervención patrimonial, nun proxecto que quere contar coa participación das entidades culturais que actúan no territorio.

Así, tamén o Plan buscará promover a coordinación entre as diferentes administracións que participan no proxecto e fomentar a participación da cidadanía no proceso de elaboración e redacción. Quérese que, ademais, p obxectivo fundamental sexa socializar o patrimonio arqueolóxico do territorio atendendo a tres eixes fundamentais, a comunidade local, centros escolares e turismo cultural.

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar. Non esquezas deixar o teu email se queres que o autor/a che dea unha resposta

Pode que che interese...

Informe de erros

O seguinte texto será enviado aos nosos editores: