Alertan do grave perigo do coro lígneo da catedral de Lugo, unha das grandes obras artísticas do templo | Historia de Galicia
Coro lígneo detalle / foto Catedral de Lugo

Alertan do grave perigo do coro lígneo da catedral de Lugo, unha das grandes obras artísticas do templo

Tempo de lectura: 2 min.

O coro lígneo da catedral de Lugo estase a desfacer por dentro. Aínda que dende fora loce con relativo bo aspecto, como unha das grandes xoias da arte en madeira en Galicia, grazas a un verniz aplicado en 1950-60, interiormente atópase nun especial mal estado grazas a acción dos xilófagos, ou organismos que devoran a madeira.

Pois así deu a voz de alarma César Carnero, responsable do patrimonio histórico da diocese. Segundo el “a madeira de nogueira estase a desfacer”, porque, aínda que no seu día foi unha madeira moi boa para traballar, hoxe é unha madeira moi apetecible para a carcoma ou caruncho, o que fai que o seu estado sexa neste momento especialmente fráxil.

Coro lígneo / foto Catedral de Lugo

Segundo o experto compriría facer unha restauración profunda, desensamblándoo, recuperando as pezas e comprobando o estado da estrutura, da que, na actualidade, nada se sabe do seu estado. Ademais Carnero afirma que nunha posible intervención poderían atoparse posibles elementos do coro medieval. Pero polo de agora a diocese non conta con fondos para un traballo de complexidade tal.

O coro lígneo é un dos grandes elementos artísticos da propia catedral de Lugo. Obra do gran escultor Francisco de Moure é o único coro de Galicia que se conserva no seu lugar orixinario, na propia nave da catedral. O coro, que ademais acaba de cumprir 400 anos, podería considerarse para moitos “o mellor coro barroco do século XVII de España”. Recolle a nova en profundidade La Voz de Galicia.

Coro lígneo / foto Catedral de Lugo

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar. Non esquezas deixar o teu email se queres que o autor/a che dea unha resposta

Pode que che interese...

Informe de erros

O seguinte texto será enviado aos nosos editores: