Atopan un sistema defensivo “impoñente” no Castro de Rueta
Un equipo do Consello Superior de Investigacións Científicas (CSIC) inicia un estudo preliminar do castro de Rueta, en Cervo, que busca, cunha metodoloxía pioneira en Galicia, avaliar o seu estado de conservación e considerar a súa idoneidade para o desenvolvemento de actuacións máis ambiciosas nun futuro próximo.
“As actuacións previstas agora contemplan aplicar métodos de traballo non invasivos para espremer as informacións dispoñibles sobre a biografía deste xacemento sen mover nin un gran de terra. E é que os métodos de prospección xeofísica, o estudo do poboado fortificado con diferentes sensores transportados por drons, así como o estudo de imaxes aéreas e satelitales, serven para evitar afeccións sobre o xacemento antes de considerar a súa idoneidade para poñer en marcha un programa de actuacións con métodos máis habituais en arqueoloxía, como a escavación”, explica o equipo do CSIC.
Estas actuacións tomaron forma grazas á iniciativa da Asociación Mariña Patrimonio, desde onde se solicitou o apoio da área de Cultura da Vicepresidencia da Deputación de Lugo a través dunha subvención para desenvolver investigacións arqueolóxicas. Tamén o Concello de Cervo achegou persoal e medios propios para efectuar unha roza extensa do castro e a súa contorna e facilitar así as actividades arqueolóxicas. Fondos propios do CSIC completan o orzamento dispoñible.
“A limpeza da densa vexetación que cubría o castro permite xa obter unha imaxe inédita del: destaca un sistema defensivo impoñente, con varias liñas de murallas e fosos que mostran un bo estado de preservación”, sinalan desde o CSIC. As actuacións estarán abertas á cidadanía, con varias actividades divulgativas durante a próxima semana. Entre elas destaca unha visita guiada ao castro o mércores, 2 de novembro, de alumnado de centros educativos de Cervo e unha xornada de portas abertas para o público xeral.
O equipo do CSIC, coordinado por David González Álvarez (Instituto de Ciencias do Patrimonio) e por Jesús García Sánchez (Instituto de Arqueoloxía de Mérida), confía en desvelar aspectos como a densidade de construcións antigas observables, a entidade das súas murallas, ou a existencia de restos arqueolóxicos en zonas da contorna do castro onde non foran observadas trazas da súa antiga ocupación.