Atopan novos restos dun gran mausoleo funerario de Lucus Augusti

Dúas lápidas funerarias de orixe romana de relevante valor histórico foron achadas durante as obras de peonalización que o Concello de Lugo leva a cabo na rúa Quiroga Ballesteros. Diso informou o Concello de Lugo, que explica que na primeira inspección levada a cabo polo Servizo municipal de Arqueoloxía constatouse que as pezas teñen un relevante valor histórico, xa que a súa dotación sitúase entre o século I e II.

As pezas atópanse fóra do contexto funerario para o que foron concibidas, polo que os arqueólogos consideran que puideron pertencer a un mausoleo dunha necrópole próxima, como a localizada na Praza de Ferrol nas escavacións arqueolóxicas dos aparcadoiros subterráneos en 1986. Esta fora desmantelada en período romano para ampliar a cidade amurallada e os seus restos foron reutilizados con posterioridade para distintos proxectos de obra civil e edificacións.

O Concello de Lugo destaca que unha das lápidas atópase nun excelente estado de conservación e contén información de valor histórico relevante. Así, na súa inscrición pódese apreciar o seu carácter funerario pola utilización da fórmula ‘Dis Manibus’ (implorando a protección dos deuses Manes, os deuses dos defuntos), que pertenceu ao sepulcro dunha muller chamada posiblemente Rufina.

En Concello sinala que na outra lápida non se observa aparentemente ningunha inscrición, polo que todo indica que estaba alisada e preparada para ser gravada pero que nunca chegou a facerse, aínda que indica que é necesario esperar a probas posteriores para confirmalo.

A alcaldesa de Lugo, Lara Méndez, avanzou este venres que a intención do goberno local é que, unha vez cumprido con todo o proceso regulamentario, as pezas poidan ser expostas dentro da rede museística municipal. “A aparición de restos arqueolóxicos desta relevancia supón unha excelente noticia para a nosa cidade. A recuperación e posta en valor do noso patrimonio supón unha oportunidade para todas e todos os lucenses”, considera a rexedora, que asegura que traballarán para “desenvolver todo o seu potencial”.

Por último, a rexedora indicou que o achado non afecta o desenvolvemento dos labores que se realizan en Quiroga Ballesteros. Neste momento, ambas as lápidas atópanse xa custodiadas polo arqueólogo da empresa adxudicataria da obra e serán inventariados para notificar a súa aparición á Consellería de Cultura.