Continúan as obras de restauración de fontes históricas en Caldas
Unha nova fonte sumarase á nómina de fontes históricas que a vila de Caldas está a restaurar. Trátase da fonte de Tibo, na parroquia de Santa María de Caldas en pleno Camiño Portugués. A restauración da fonte, que data de 1880, estará dirixida polo arquitecto Luis Gil Pita, que xa dirixiu anteriores intervencións nas fontes da vila, e desenvolta pola empresa Topodel.
A obra, que comezou o pasado venres día 1, afectará a súa estrutura de granito, limpando e encintando as pedras e xuntas do vaso e tanque, así como eliminando as afloracións bioxénicas internas. Mais polo de agora estase a desenvolver un levantamento topográfico e fotogramétrico do estado actual do complexo así como a relación coa súa contorna.
Tamén se tomaron mostras das diferentes capas de pintura que cubriron os seu canos. Unha vez redactado o proxecto requirirá de informe favorable da da Dirección Xeral do Patrimonio Cultural da Xunta de Galicia ó formar parte do Camiño Portugués de Santiago.
Programa Fontes no Camiño
Como unha das vilas termais por excelencia de Galicia, as fontes de Caldas son un dos seus sinais de identidade. É por iso que dende o ano 2017 o Concello está a desenvolver o programa Fontes no Camiño. Trátase dun proxecto para rehabilitar as principais fontes da vila, a maioría dos séculos XIX e XX e que conta co apoio da Deputación de Pontevedra a través do programa de conservación do patrimonio cultural.
Esta será a quinta fonte histórica sobre o que se actuará, pois o programa xa leva restauradas a Fonte da Burga, a da Praza de Abastos, a do Campo da Torre e a Fonte das Palmeiras, que continúa en obras na actualidade. O programa conta, ademais da dirección do arquitecto Luis Gil Pita, co traballo dos restauradores Santiago Martínez e Guillermo Rodríguez.