fbpx
Unha gaita no Castro Animado / foto HdG

Queres coñecer todos os segredos sonoros de Galicia paseando por Compostela?

Tempo de lectura: 2 min.

Imaxina camiñar polas rúas de Santiago de Compostela. Cada punto da cidade agocha un código QR. Escanealo e escoitar cos auriculares do teu móbil un anaco dunha peza da nosa música tradicional. Xunto a el toda a información do audio, a quen lle foi gravado, cando, por quen, e que profesional da nosa música e da nosa cultura escolleu a peza.

Este é a singular proposta do Concello de Santiago para amosarnos un xeito diferente de percorrer e gozar a cidade. Trátase do proxecto Paseo Sonoro que poderá disfrutarse durante catro días, do 24 ao 27 de marzo, nas rúas da cidade. O proxecto contará tamén con espectáculos ó vivo, encontros, unha charla, un obradoiro ou unha escoita comentada en distintos puntos da cidade.

Trátase así dun “paseo” para realizar de xeito autónomo e gratuíto, concebido tamén como unha ruta turística circular e diferente polo Casco Histórico. A actividade conta con 21 espazos seleccionados entres museos, comercios e locais hostaleiros, comezando na Oficina Central de Turismo de Santiago e rematando na Rúa Nova.

Un recuncho da rúa Nova / foto m dolores paderne sa CCBy Wikimedia

Os códigos atópanse nos escaparates e cristaleiras, polo que non é preciso depender dos horarios de apertura dos establecementos podéndose gozar ó noso ritmo e a calquera hora en cada paseo. Tamén haberá con concertos programados no Teatro Principal en función, sempre, dos aforos permitidos.

Arquivos sonoros e creación contemporánea

Ademais este Paseo Sonoro, co que colabora Turismo de Santiago, enmárcanse no programa de “O que non se escribe. Arquivos sonoros e creación contemporánea“, unhas xornadas de aprendizaxe e experimentación sobre o patrimonio sonoro galego e, ó tempo, unha posta en común dos proxectos máis actuais arredor da música tradicional desde unha óptica tan propia como global.

Un proxecto único que pon o foco no que fomos, o que somos e o que tendemos a ser como país musical. As xornadas están organizadas por Luneda Producións e apoiadas polo Concello de Santiago de Compostela, a través da Concellaría de Acción Cultural e de Turismo de Santiago, así como pola Secretaría Xeral de Política Lingüística da Xunta de Galicia.

Gaiteiro no arco do pazo de Xelmírez foto jcarnota0CC0

 

Se atopou algún erro nesta noticia, por favor avísenos seleccionando o texto ou palabra en cuestión e presionando Ctrl+Entrar. Non esquezas deixar o teu email se queres que o autor/a che dea unha resposta

Pode que che interese...

Informe de erros

O seguinte texto será enviado aos nosos editores: