O gran misterio da Cibdá de Armea continúa
A novena campaña arqueolóxica en Armea, na parroquia alaricana de Santa Mariña de Augas Santas, rematou o pasado venres deixando novos achádegos no coñecemento histórico da antiga “Cibdá de Armea”. A intervención deste ano na denominada Finca da Atalaia, de propiedade municipal, centrouse nos traballos de escavación da domus leste, asomando importantes mostras de estruturas e estancias nas que se atoparon restos tanto pétreos coma de materiais cerámicos, tellas e vidro ademais de pequenas alfaias na súa maioría elaboradas en bronce.
A Cibdá de Armea, que segundo os arqueólogos estivo habitada entre os séculos I e II da nosa era, ten de momento escavadas 3 domus e unha vía central. Dentro desas domus o visitante pode atopar estancias con lareiras, muíños, zonas dedicadas a produción de utensilios de metal e vidro. Os investigadores non deixan de sorprenderse pola importancia deste xacemento, así como todo o que rodea o lugar de Santa Mariña de Augas Santas.
Adolfo Fernández, do Grupo de Estudos en Arqueoloxía, Antigüidade e Territorio (Geaat) e Vicedecano da facultade de Historia da Universidade de Vigo, desenvolveu durante este mes de agosto a escavación froito do convenio de colaboración subscrito entre Universidade de Vigo e o Concello de Allariz. A Xunta de Galicia participa por primeira vez no financiamento dos traballos -a través da dirección xeral de Patrimonio- cunha achega de 30.000 euros. Toda a información no xornal Galicia Confidencial.